العمل .. حق .. واجب .... أزعاج

يا سلام... لو أن العالم توقف فجاءة عن الدوران ... أو أنه وبقدرة قادر .. أصدر مجلس الأمن قرار بوقف كل أشكال العمل والحركة والفعل ... وأن كل واحد حيوصله الأكل في البيت بالأميل ... ويا سلام كمان لو كان ده مشفوع بالترفية والحرية والسلام العالمي.... ويا ريت يكون ده أخر قرار للمجلس ... خصوصاً أنه مبقاش ليه شغلانة ولا قيمة الأيام دي

أكيد عشان يحصل ده لازم نلغي الشركات الكبري .. لأنها كده مش حتشتغل .. وأكيد أربحها حتقل .. أو تنتهي ... وكمان لازم نخترع عدد لا نهائي من الرجال الآلين عشان يقوموا بكل أدورنا .. من الزراعة والصناعة وقيادة المركبات .. وحتى التمثيل السينمائي ... لأن السينما عمل هي كمان .. والممثل بيمارس عمل .

وكمان يا سلام .. يا سلام لو أن المقاهي تشتغل بالكمبيوتر .. تقعد على الكرسي وتكلم صاحبك ودوس على زر في الترابيزة  وتختار طلبك .. ولو كسلنا ممكن نبقي نطور المشروع ونخلي الكمبيوتر يستجيب للأوامر الصوتية ... المهم تطلب الطلب وبعد ثواني تنشق الترابيزة ويطلع ذراع ألي يقدم لك الطلبات .. ويتم التوصيل من خلال شبكة معقدة من المواسير والأنابيب اللي بتمر تحت الشوارع والحواري وبتلف حولين العالم سبع لفات ..  يشرط أنها تكون كمان غير قابلة للتهتك أو أنها تتقطع زي كابلات النت ... الأنابيب دي شغلتها الوحيدة أنها توصل الطلبات زي كابلات النت بالضبط ... وده بالطبع يشمل الشيشة لهواتها من الرجال والنساء والأطفال .. 

وبكده نبقي خلصنا مش من شغلانة القهوجي بس .. لا كمان خلصنا من شغلانة الزبون ... وممكن لو المشروع نجح نتخلص من الروائين والشعراء والكتاب المسرح والفنانين التشكلين .. والكمبيوتر يقوم بالعملية على خير ما يرام ... وزي ما النقاد بيقولوا ... النص هو جماع كل النصوص السابقة التي تم كتابتها منذ فجر التاريخ ... يبقي الكمبيوتر حيعرف يختار ويولف النصوص والألوان مع بعض ..

كمان نبقي نخترع لنا جهاز يطبخ ويغسل .. ولو كسلنا قوي أو تعبنا يقوم بالدور الجنسي مع الشريكة / أو شريك الحياة ... اللي ممكن يكون هو كمان تعبان ومشغل الجهاز الخاص بيه .... بس نبقي نخلي بالنا لحسن الأجهزة دي يحصلها أي خلل وتدور علينا .... 

ولو ضمنا الموضوع ده ممكن جداً تيجي اللحظة اللي نتخلص فيها من الجنس البشري كله ونستريح للأبد من قرفنا من وجود كائنات قادرة على ممارسة القتل المجاني ... زي قادة أسرئيل وجيشها ...  وكذلك حنبقي تخلصنا من الفقر والجوع والأمراض وبطريقة أكثر بساطة من طريقة أحمد فؤاد نجم والشيخ أمام اللي بيقترحوا قتل كل الجعانين لحل مشكلة الجوع في واحدة من أغانيهم .

.......................

بس لو أن العمل يصبح صديق وغاية ... لو أن الحياة تبقي بروعة الألعاب اللي في الكمبيوتر .. نمارسها بكل عواطفنا وبأروحنا ... من غير ما ننجرح  .. من غير ما نموت .. أكيد حنبقي في عالم حقيقي ... عالم ممكن فيه العمل يتحول من وسيلة أستعباد وقهر وأستغلال ... لغاية ... لمتعة .. 

أنا بحب عملي .. لكن بكره قدرته الهايلة على أزعاجي وعلى مطاردتي صبح وليل من غير ملل ولا كلل .. وبكره زميلي في العمل ... وبكره اللي بيشتغلوا شغلتي وساعات بحس أن وظيفتي لو أتلغت محدش حياخد باله غيري .. مش عشان حاجة غير أن المرتب حيقف.. بس الحمد لله لأن محدش واخد باله من الموضوغ ده غيري ..

وكمان بكره فكرة الكتابة لما تتحول لواجب مدرسي ... أو لما تكون من غير روح من غير أحساس .. من غير ما تحس بروحك وهي بتنور ... من غير ما تحس وأنت بتكتب بأنك بتكتشف قارة جديدة.. أرض بكر أول مرة أنسان يشوفها ... ومن غير كل ده يبقي مفيش فرق بين الكاتب والكتوبجي والباشكاتب والعرضحالجي ...

العمل .. حقي ومتعتي ... وعملية تعذيبي الدائمة